29. april 2002 UPA2002/29

 

Meeqqat atuarfiat pillugu Inatsisartut peqqussutissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

aappassaanneerinissamut saqqummiunneqartoq

 

Inatsisartut Kultureqarnermut Ilinniartitaanermullu Ataatsimiititaliaat suliarinninnermini uku-ninnga inuttaqarpoq:

 

Inatsisartuni ilaasortaq Naimángitsoq Petersen, Atassut, siulittaasoq
Inatsisartuni ilaasortaq Ruth Heilmann, Siumut, siulittaasup tullia (UKA01-mi siulittaasoq)
Inatsisartuni ilaasortaq Lars Karl Jensen, Siumut
Inatsisartuni ilaasortaq Olga Poulsen, Inuit Ataqatigiit (Paninnguaq Olsen, UKA01-mi sinniisussaq)
Inatsisartuni ilaasortaq Mogens Kleist, Kattusseqatigiit

 

Inatsisartut Kultureqarnermut Ilinniartitaanermullu Ataatsimiititaliaata UKA2001-imi siullermeerneqarnerata kingorna Meeqqat atuarfiat pillugu Inatsisartut peqqussutissaattut siunnersuut misissuataarpaa imaattunillu oqaaseqarfigissallugu:

Siunnersuutip ataatsimiititaliamit suliarineqarneranut atatillugu ataatsimiititaliaq UKA01-imi ukiullu ingerlanerani arlaleriaqaluni ataatsimiittarpoq. Ilanngullugu ataatsimiititaliamit IMAK aamma KANUKOKA UKA01-ip nalaani kiisalu 2002-mi upernaakkut ataatsimeeqatigiumallugit aggersartarsimavai aamma Naalakkersuisunut ilaasortaq "Atuarfitsialak" pillugu pingasoriarlugu isumasioqatigalugu ataatsimeeqatigineqartarpoq: UKA01-imi kiisalu 2002-imi upernaakkut.

Taakku saniatigut ataatsimiititaliaq marloriarluni Kangerlussuarmi isumaqatigiinnernut 2001-ip upernaavani "Atuarfitsialak" pillugu siunnersuusiornermi peqataavoq.

Tulliuttumi ataatsimiititaliap immikkoortut oqaaseqarfigissavai:

1 Inatsisissanik nalilersuisarfik
2 Ataatsimiititaliap nalinginnaasumik isummernera
3 Paasissutissiisarnerup ingerlaarnera
4 Ataatsimiititaliap oqaaseqaatai
4.1 Annertusisamik immikkut ittumik ilinniartitsineq
4.2 Ineqarfiutigalutik atuartunut angerlarsimaffinni inissat
4.3 Sanaartugassat iluarsagassallu
4.4 Akunnerit ilinniartitsiviusussat
4.5 Piffissap atortuulersitsiviusussap kinguartinneqarnera
4.6 Atuartunut angajullernut tapiissuteqartarneq
5  Ataatsimiititaliap inassuteqaataa


Immikkoortoq 1.0 Inatsisissanik nalilersuisarfik

Inatsisartut Inatsisissanik nalilersuisarfiata inatsisissamut siunnersuut misissuataarpaa arlalinnillu oqaaseqaateqarfigalugu. Ataatsimiititaliap KIIIP-p oqaaseqaatinut taakkununnga akissutai pissarsiarisimavai, paasillugulu, Pisortaqarfimmit allannguutissatut inassutigineqartut annertunerpaamik atortuulersinneqarsimasut.

Oqaatigineqassaarli atuartut sinniisaasa aningaasarsianik pissarsisannginnerat ataatsimiititaliap pissusissamisuunngitsutut isigigaa. Angajoqqaat sinniisaasa aningaasarsiaqartinnerat ataatsimiititaliap pissusissamisoortutut isigivaa. Soorlu inatsisissamik nalilersuinikkut oqaaseqaatigineqartutut siunnersuummut oqaaseqaatigineqartariaqarput: "Uppernarsartariaqartoq taamatut assigiinngisitsineq naammaginartunik pissusiviusunillu tunngaveqartunik piumasaqaatitaqartoq imaluunniit assigiinngisitsineq atorunnaarsinneqartariaqartoq".

Ataatsimiititaliap isumaqatigiittup Naalakkersuisut qinnuigissavai, atuartut sinniisaat angajoqqaat sinniisaannut sanilliunneqarsinnaasunngorlugit sulinermullu aningaasarsiaqartilerlugit allannguutissatut siunnersuummik saqqummiusseqqullugit.

Ataatsimiititaliap pingaartutut isigimmagu, atuarfiit siulersuisuini sulinerup pilerinartunngortinneqarnissaa. Meeqqat atuarfiat pitsaasoq, iluarinartoq, angajoqqaat, atuartut ilinniartitsisullu akornanni suleqatigiinnikkut pilersinneqartussaq.

Immikkoortoq 2.0 Ataatsimiititaliap nalinginnaasumik isummernera

Inatsisartut Kultureqarnermut Ilinniartitaanermullu Ataatsimiititaliaata Meeqqat atuarfiat pillugu Inatsisartut peqqussutissaattut siunnersuut manna pitsaasutut isigaa. Siunnersuut meeqqat atuar-fiani atuartunut atuartitaanikkut pitsanngortitsinissamik nuannersumik ilimasulersitsivoq, inuiaqatigiinnut avatangiisaasunut sunniisinnaassuseqarluartussaammat. Atuartitaanikkut pitsan-ngortitsineq atuartut tunngaviusumik piginnaasaannik pitsanngortitsinermik annerulersitsisussaq tamatumalu kingunerisaanik suliffeqarnikkut imminut pilersorsinnaanerunermut sunniisinnaassuseqarluartussaq.

Meeqqat atuarfianni suliassat pingaarnerpaat ilagaat atuartut eqqarsartaatsikkut timikkullu ilisimasaannik piginnaasaannillu ineriartortitsinissaq. Inuiaqatigiit silarsuarmi allanngorartuartumi ineriartornerinut aamma kikkut tamat oqartussaaqataatillugit eqqarsartaaseqalernissaannut meeqqat atuarfiani atuartut paasinnittarnerat siuarsarneqassaaq.

"Meeqqat atuarfiat pillugu Inatsisartut peqqussutissaattut siunnersuutip" ilusilersorneqarnerani pingaartinneqarnerpaavoq, meeqqat atuarfiata suliassat naammassissagai. Tamakku siuarsarneqarsinnaanerinut periusissat ilagaat, atuartitsinermi atuartitsissut klassimiluunniit alloriarfimmi sorlermiinneq apeqqutaatinnagit init atuartitsiviusut meeqqat samminerullugit aaqqissuunneqarsimassasut. Meeraq qitiutillugu.

Maannakkut meeqqat atuarfiat ukiuni kingullerni annertuumik isornartorsiorneqartarpoq ilaatigut atuartitsinerup pitsaassuunnginnera pissutigalugu. Meeqqat atuarfiani atuartut naammaginartumik pitsaassusilinnik angusaqartarsimanngillat, tamatumalu kingunerisarsimallugu ingerlaqqiffiusunik ilinniaqqinnerni ilinniagaqartut ilaasa naammassinissaminnut angusatigut ajornartorsiuteqalersarnerat.

Siunnersuutikkut siunniunneqarpoq atuarfik ataqatigiiffiunerusoq atuartunik alloriarnernut nukarlernut, alloriarnernut akullernut aamma alloriarnernut angajullernut agguataarisoq taamaalillunilu klassit akornanni killiliussaasartut akimorlugit ilinniartitsineqartarluni. Tamatumap kingunerissavaa, ullumikkornit pitsaanerusumik atuartup ataatsip pisariaqartitsineranut atuartitsinerup naleqqussarneqarnissaanut periarfissaqartoqalernissaa.

Ataatsimiititaliaq ima paasinnippoq, Meeqqat atuarfiat pillugu Inatsisartut peqqussutissaattut siunnersuutikkut siusinnerusukkut isornartorsiutaasartut tusaaniarneqartut aaqqiissutissatullu siunnersuummik pitsaalluinnartumik anguniagaqarfiulluartumillu saqqummiussisoqartoq.


Immikkoortoq 3.0 Paasissutissiisarnerup ingerlanneqartarnera

Siunnersuutip suliarineqaqqaalernerata nalaani ataatsimiititaliaq annertuumik akuutinneqarpoq ilisimatinneqartarlunilu isumasioqatigiissitsisarnertigut Kultureqarnermut Ilinniartitaanermullu Naalakkersuisumit isumasioqateqarluni ataatsimeeqatiginnittarnertigut.

Ataatsimiisititaliap taamatut ammasumik periuseqarneq taamatullu suleqateqarneq pitsaalluinnartutut nalilerpaa neriuutigalugulu, taamatut suleriaaseqarneq siunissami Naalakkersuisuni ilaasortamit qanoq iliorluni suleqateqartarsinnaanermut assersuutissaallualerumaartoq.


Immikkoortoq 4.0 Ataatsimiititaliap oqaaseqaatai

Ataatsimiititaliamit - ilaatigut tusarniaanermi akissutigineqartut aamma siunnersuutip siullermeerneqarnerani oqaatigineqartut tunngavigalugit - ajornartorsiorfiusartut arlallit oqaloqatigiissutigineqartarput minnerunngitsumik uku pillugit:

Oqaatigineqassaaq, pingaartumik annertusisamik immikkut ittumik ilinniartitsineq aamma ikinnerpaamik akunnerit atuartitsiviusussat suliarineqarnerinut atatillugu ataatsimiititalitaliamit kommunit KANUKOKA-llu isummerneri annertuumik pingaartinneqarmata.


Immikkoortoq 4.1 Annertusisamik immikkut ittumik ilinniartitsineq

"Meeqqat atuarfiat pillugu peqqutissatut siunnersuummut" nalinginnaasumik oqaaseqaatini allas-simavoq: " Immikkut ittumik ilinniartitsisarnerup tungaa tamarmi aaqqissuussaanikkut aningaasalersorneqarnikkullu kommuniniitinneqalissasoq". Naalakkersuisuni ilaasortaq naapertorlugu taamatut aaqqiisoqarnissaa kissaatigineqarpoq, pissusissamisoornerpaatummi isigineqarmat akisussaaffiup, oqartussaanerup aningaasaqarnerullu akornanni ataqatigiittoqarnissaa. Ullumikkut kommunip atuartut immikkut ittumik annertusisamik ilinniartinneqartussatut innersuussutigisarpai, aningaasaqarnikkulli akisussaaffik Namminersornerullutik Oqartussaaniilluni.

Ataatsimiititaliamit Naalakkersuisunut ilaasortaq isumaqatigineqarpoq oqarami kommunini atuartut ataasiakkaat pisariaqartitaannik kommunit ilisimasaqarnerusut. Aamma suliamik sulia-rinninneq sukkanerullunilu ajornannginnerussaaq, kommunit kisimiillutik atuartoq immikkut ittumik annertusisamik ilinniartinneqartariaqarnersoq pillugu aalajanngiisartuussappata. Siunnersuut naapertorlugu perorsaanikkut psykologimullu tunngasunik siunnersuisarfik (PPR) siunissami taamaallaat kommuninut siunnersuinerinnarmik suliaqalertussaavoq.

Ataatsimiititaliamit, aaqqissuussinerup taama ingerlalluartigisup pingaaruteqartigisullu, annertusisamik immikkut ittumik ilinniartitsinerup, allanngortinneqarnissaa pissusissamisoorsorineqan-ngilaq. Siusinnerusukkut annertusisamik immikkut ittumik ilinniartitsineq kommunit akisussaaffigisimavaat, taamatulli aaqqissuussineq allanngortinneqarpoq, tamatumalu kingorna oqartussaanerup Namminersornerullutik Oqartussanut nuunneqarnissaa qinerneqarluni. Maannakkut aaqqissuussineq atorsinnaavoq kommunilu najugarisaq apeqqutaatinnagu atuartunik assigiiaartumik tapersersuinermik qulakkeerinnittarluni, perorsaanermut psykologiimullu tunngasunik siunnersuisarfiup (PPR) qitiusumik inissisimasup aalajangiisuusarnera pissutigerpiarlugu. Taa-maattumik ataatsimiititaliamit tunngavissaqartinneqanngilaq tamatumap allanngortinneqarnissaata kaammattuutigineqarnissaa.

Aningaasalersuinissaq eqqarsaatigalugu uparuarneqassaaq kommunimiit kommunimut immikkut ittumik ilinniartitsisoqarnissaanik pisariaqartitsineq assigiinngisitaartorujussuummat.Tamatigullu periarfissaqartoqartarani innarluutilimmik immikkut ittumik atuartinneqarnissaanut innersuussisinnaaneq, taamaattumillu suliassaq tamanna meeqqat atuarfiata isumagisariaqarlugu. Aamma kommuneqarsinnaavoq pisariaqarneratut ikiorsiinissamik neqerooruteqarnissamut aningaasatigut ilinniakkatigullu nukissaqanngitsunik, tassunga ilanngullugit atuartunik immikkut annertusisamik ilinniartitsinissamut eqqarsartaatsikkut ikiorsiineq. Peqqussutissatut siunnersuutikkut isummerfigissassanngortinneqarpoq ataatsimoortumik tapiissutinik agguaassisarnermi kommunikkaartumik nalimmassaalluni aaqqissuussisoqarnissaa. Ataatsimiititaliap pissusissamisoornerungaartutut isigaa maannakkut "aningaasat atuartumut malinnaasarnissaat". Atuartunik annertusisamik immikkut ittumik ilinniartitsinermi kommuni sorlerluunniit allamut nuutto-qarnerani / kommunimulluunniit nuuttoqarnerani kommuni immikkut ittunik aningaasartuuteqartinneqalissanngitsoq, ataatsimiititaliap annertuumik pingaarutilittut isigaa.

Ataatsimiititaliap isumaqatigiittup Naalakkersuisut qinnuigissavai, annertusisamik immikkut ittumik ilinniartitsinermi ullummikkutut aaqqissuussinerup attatiinnarneqarnissaa pillugu allannguutissatut siunnersuummik saqqummiusseqqullugit.


Immikkoortoq 4.2 Ineqarfiutigalutik atuartunut angerlarsimaffinnik sanaartorneq

Kingullermik ataatsimiititaliamit KANUKOKA-p ataatsimeeqatigineqarnerani oqaatigineqarpoq, "Atuarfitsialaap" atortuulersinneqarnerani ineqarfiutigalutik atuartunut angerlarsimaffinnik pisariaqartitsineq annertusisussatut naatsorsuutigineqartoq. Tamanna pisariaqartussaavoq, taamatummi alloriarfinnut pingasunut nutaanut avitsilluni aaqqissuussinerup kingunerissammagu nunaqarfinni ukiunik pingasunik sivisussusilimmi atuartut angajulliit alloriarfimmiittut allan-ngortitsineq taanna atuartitaanikkut annertunerpaamik pissarsivigisinnaajumallugu illoqarfiliartariaqartalernissaat ilimanarsinnaammat.

Naalakkersuisunulli ilaasortamit imaannerarneqarpoq mannakkorpiaq amerlanerusunik sanaartortoqarnissaanik pisariaqartitsisoqanngitsoq, taamatummi nutaamik aaqqissuussinermi klassit ataatsit atorunnaassammata. Ilanngullugu nuna tamakkerlugu meeqqat atuarfiani atuartunut ine-qarfiutigalutik atuartunut angerlarsimaffinni inissanik sinneruttoqarmat.

Ineqarfiutigaluni atuarfimmi angerlarsimaffittut init pitsanngorsarneqarsimapput, taamaalillutillu maannakkut pitsaassusissamik piumasarisaasunik eqquutsitsisunngorsimallutik, ineqarfiutigalutik atuartunut angerlarsimaffinni initigut qulaani taaneqartutut taamaanneraaneq KANUKOKA-p ilumuunnginnerarpaa Namminersornerullutik Oqartussanit oqaatigineqartunit ikinnerunerarneqarmata.

Ataatsimiititaliamit pingaartutut isigineqarpoq, "Atuarfitsialaap" aallarnisarneqarnerani pitsaanerpaanik tunngavissiiumalluni pisariaqartinneqartunik aningaasanik immikkoortitsisoqarnissaa. Taamaattumik aamma ataatsimiititaliamit pingaartutut isigineqarpoq, ineqarfiutigalutik atuartunut angerlarsimaffinni inissat pisariaqartinneqartutut amerlassusaasa pigineqarnissaat.

Ataatsimiititaliap isumaqatigiittup ineqarfiutigalutik atuartunut angerlarsimaffiit tungaatigut qanoq killiffeqartoqarnerata misissuiffigineqarnissaa Naalakkersuisunut KANUKOKA-mullu qanoq pingaaruteqartiginera uparuaassutigissavaa. Aamma ingerlaavartumik paasitinneqartarnissaq ineqarfiutigalutik atuartunut angerlarsimaffinni inissaqarnerup qanoq ittuunerata maannakkorpiaq sukumiisumik ilisimatitsissutigineqarnissaa, taamaasilluni inissaqassuseq kommunini ataasiakkaani pisariaqartitsinermut piumasaqaatinullu naleqqussarneqassalluni.


Immikkoortoq 4.3 Sanaartugassat iluarsagassallu

Atuarfiit ineqarfiutigalutillu atuartunut angerlarsimaffiit illuutaannut sanaartornissamut iluarsaassisarnissanullu pisussaaffik ullumikkut Namminersornerullutik Oqartussaniippoq, maannakkulli meqqaat atuarfiat pillugu peqqussummi aamma meeqqat atuarfiat pillugu peqqutissatut siunnersuummi siunertaavoq pisussaaffiup kommuninut nuunneqarnissaa. Sanaartornissamut iluarsaassisarnissamullu pisussaaffik annertuumik aningaasartuuteqarfiusussaavoq, pingaartumik kommuninut mikinerusunut tigussallugu ajornartorsiutitaqartussaq. Ajornartorsiut suli ilungersunarnerulissaaq illuutit pitsaassusiat ininillu amigaateqarneq kommunimit kommunimut assigiinngitsorujussuummat.

Ataatsimiititaliaq isumaqarpoq, innuttaqassuseq naapertorlugu kommunit aningaasatigut assi-giinnik atugassaqartittariaqartut, taamaasilluni nunatsinni sumiikkaluaraanniluunniit ilinniartitaanikkut illutatigullu pitsaassutsit assigiit neqeroorutigineqartariaqarmata. Taamaattumik ataatsimiititaliap Naalakkersuisut kaammattorpai isumaqatiginninniarnikkut taakkua KANUKOKA-mut paaseqatigiissutiginiaqqullugit.

"Atuarfitsialak" iluatsissappat nunatsinni artuarfiit allineqarnissaasa iluarsaanneqarnissaasalu "Atuarfitsialammi" siunertarineqartunut aammalu illoqarfinni nunaqarfinnilu pisariaqartitsinermut naapertuuttumik ingerlanneqarnissaat ataatsimiititaliamit pingaartinneqarpoq.

Atuarfiit sanaartugassatigut iluarsagassatigullu pilersaarusiorneqarneri Naalakkersuisut qanoq iliorlutik piviusunngortinniarnerlugit pilersaarutaat ataatsimiititaliap arlaleriaqaluni ujartortarsimavai.

Ataatsimiititaliaq isumaqarpoq atuarfiit illutaasa avatangiisaasalu pitsaassusaat atuartut ilikkagaqarusussuseqarnerannut aalajangiisuusumik pingaaruteqartut.

Ataatsimiititaliap isumaqatigiittup Naalakkersuisuni ilaasortaq atuarfinnut sanaartugassatigut iluarsagassatigullu pilersaarummik piaartumik saqqummiussaqaqqullugu kaammattussavaa, taamaasilluni atuarfiit illutaat "Atuarfitsialammi" siunertarineqartumut naapertuuttunngortinneqassammata.


Immikkoortoq 4.4 Akunnerit ilinniartitsiviusussat

Ataatsimiititaliamit paasineqarpoq meeqqat atuarfiat pillugu Inatsisartut peqqussutissaattut siunnersuutaasumi ikinnerpaamik akunnerit ilinniartitsiviusussat qassiunerat klassinut ataatsinut ukiumut nalunaaquttaap akunnerinik 30-nik ikilisinneqarsimasut peqqussutissatut siunnersuummut tusarniaassutigineqartumut naleqqiullugu. Siunnersuutaaqqaartumi siunertaagaluarpoq, maannakkut akunnerit ukiunut 11-12-nut agguataakkat, ukiunut qulinut (10) agguataarneqassasut. Peqqussutissap nutaap atuutilerneratigut ukiut atuarfiusussat ikilisinneqaraluartut, atuartut nalunaaquttap akunnerinik atuarfissaminnik annaasaqassanngillat.

Peqqussutissatut siunnersuummut matumunnga oqaaseqaatini oqaatigineqarpoq taamannak akunnernik ikilisitsineq pissasoq aaqqissuussinerup atortuulersinneqarneranut atatillugu aningaasartuuteqarnerussutissat ikilisinneqarnissaat siunertaralugu.

Siunnersuummut oqaaseqaatini oqaatigineqarpoq: "Kommunit maannakkutut akunnernik amerla-nerusunik neqerooruteqartarsinnaasut" . Ataatsimiititaliap pissusissamisoortutut isiginngilaa, nalunaaquttap akunneri ima ikilitigissasut, naatsorsuutigineqartariaqalissalluni kommunit nalu-naaquttap akunnerinik amerlanerusunik tunniussisariaqalernissaat. Ataatsimiititaliamit naatsorsuutigineqarpoq akunnernik ikinnerpaaffigisassatut amerlassusilinnik illersorneqarsinnaasunik ajornartorsiutitaqanngitsumik neqeroorutigineqarsinnaasunik aalajangersaasoqarsimassasoq.

Ataatsimiititaliaq isumaqatigiittoq isumaqarpoq, aallaavittut pilersinniakkamut aningaasanik sa-pinngisamik iluatsitsiffiunerpaatitsinissamut pisariaqartinneqartunik aningaasaliisoqartariaqartoq.

Naalakkersuisunit oqaatigineqarpoq alloriarfiusumik atuartitsisarnermi ilinniartitsisussaqarniarnermilu "Atuarfitsialammi" siunertarineqartutut, vikarinik atuineq aamma nalunaaquttap akunnerinik atuanngitsoortitsisarnerit annertuumik ikilisinneqarsimanissaat.

Ikinnerpaamik akunnerit ilinniartitsiviusussat naak ikilisinneqaraluartut, ataatsimiititaliamit neriuutigineqarpoq, nalunaaquttap akunneri atorneqavissut ullumikkutut amerlatigiinnarumaartut.

Siunnersuummut oqaaseqaatini oqaatigineqarpoq sapaatip akunnerani ataatsimi 1. klassimiit 7. klassimut alloriarfiusuni ilinniagassatigut suli minutsinik 45-inik annikkillisitseqqittoqassasoq. Tamannali ataatsimiititaliap akuersaarsinnaanngilaa. Matumani pineqarput atuartut ullumikkut peqqussutaasup nalaani atuarnerminnik aallartitsisimasut, taakku atualernerminniit ukiumik a-taatsimik siusinnerusukkut ukioq atuarfitsik naammassisussaavaat. Aammattaaq ilinniartitsisut atuartitsinerup nutaamik aaqqissuunneqarneranut ikaarsaariartinneqartussaanerat eqqarsaatigisariaqarmat.

Piffissami ikaarsaariarfiusumi atuartut ikinnerpaamik akunnerit atuarfigisassaasa ikiliseqqinneqannginnissaat pillugu ataatsimiititaliap isumaqatigiittup Naalakkersuisut qinnuigissavai allannguutissatut siunnersuummik saqqummiusseqqullugit.


Immikkoortoq 4.5 Piffissap atortuulersitsiviusussap kinguartinneqarnera

Naalakkersuisut allannguutissatut siunnersuummik, 2002-mi augustimi atuuttuulerfissap 2003-mut augustimut kinguartinneqarneranik kinguneqartumik, saqqummiussaqarput.

Ataatsimiititaliap naammagisimaarlugu maluginiarpaa peqqussutissatut siunnersuutip atortuulersinneqarnissaanut piffissaliussaq ukiumik ataatsimik august 2003-mut kinguartinneqartoq. Tamanna peqqussutissap iluatsitsiviunissaanut, tassalu aallaqqaataaniilli naalakkersuinikkut ingerlatsisuniit soorluttaaq pisortanit, ilinniartitsisunit, atuartunit aamma angajoqqaanit sapinngisamik siamasinnerpaamik tapersersorneqarnissaa pingaarluinnarpoq, taamalu atortuulersitsineq aatsaat pissasoq, taamaasiornissamut naatsorsuutigisat pingaaruteqarnerpaat eqquutsinneqarpata.

Ataatsimiititaliamuttaaq pitsaasuuvoq allannguutissatut siunnersuummi atuarfiit piareersimasut maannakkut peqqussummi atuuttumi aalajangersakkat sanioqqunnissaannut akuersissummik piniarnissaannut aalajangersakkamik ilanngussisoqarnissaa, peqqussutissatullu nutaatut atuutilersussatut naatsorsuutigisaq malillugu ilinniartitsineq aallartillugu.

Ataatsimiititaliap isumaqatigiittup atortuulersitsinissamik piffissap august 2003-imut kinguartinneqarnissaa taperserpaa. Ilanngullugu ataatsimiititaliap isumaqatigiittup, atuarfiit piareersimasut august 2002-miit peqqussut nutaaq malillugu ilinniartitsinermik aallartitsisinnaanerat taperserpaa.


Immikkoortoq 4.6 Atuartunut angajullernut tapiissuteqartarneq

Naalakkersuisut allannguutissatut siunnersuummik, atuartunut angajullernut tapiissutaasartut attatiinnarneqarnissaannik kinguneqartumik, saqqummiussipput.

Ataatsimiititaliap isumaqatigiittup atuartut anginerit tapiissuteqarfigineqartarnissaat pillugu allannguutissatut siunnersuut Naalakkersuisunit saqqummiunneqartoq taperserpaa.


Immikkoortoq 5.0 Ataatsimiititaliap inassuteqaataa

Ataatsimiititaliap isumaqatigiittup, ataatsimiititaliap qulaani taaneqartutut kaammattuutigisaannut naapertuuttumik Naalakkersuisut allannguutissatut siunnersuutinik saqqummiussippata, siunnersuut tamanna tunngavigalugu akuersissutigineqassasoq, inassutigaa.

Kultureqarnermut Ilinniartitaanermullu Ataatsimiititaliaq taama oqaaseqarluni "Meeqqat atuarfiat pillugu Inatsisartut peqqussutissaattut siunnersuut" pingajussaaniigassanngortippaa.

 

Naimángitsoq Petersen, Siulittaasoq

Ruth Heilmann Lars Karl Jensen

Olga Poulsen Mogens Kleist